Cando o mar peta na porta...

A Candeloria, día dos namorados en Galicia

2012-01-28T11:53:00.006+01:00

Hai un refrán que dí "Pola Candeloria, cásanse os paxariños e maila galiñola".
Nas antigas costumes galegas, ese día, era o día do amor.
O día 2 de febreiro celébrase o día Candeloria que ten orixe nos cultos pagáns e que acabou sendo cristianizado. Era a antiga festa da luz celebrada polos celtas (Brigantia) e tamén polos romanos (Lupercales).
O nome Brigantia deriva de Brighid o Brigid, deusa celta moi poderosa. Era a figura da nova lúa, da primavera anual e das correntes mariñas. Esta época do ano, era das purificacións e do lume sagrado que liberaba a terra, propiciando a fertilidade e o espertar do sol, despois do frío e gris inverno.
Os ritos de predicción e matrimonio celebrábanse nestas datas baixo a protección dos espíritos benéficos que visitaban a terra durante esta festividade.
Considerábase o remate do inverno, o festival de purificación para preparar o camiño para o retorno da primavera e do sol. Brighid era honrada, poñendo unha candea en cada habitación ou en cada fiestra da casa.
Co paso do tempo e a mestura da cultura celta co cristianismo, esta festa do lume será homologada na celebración da Candeloria ou festa das Candeas.
O nome da Candeloria está orixinado pola procesión realizada dentro da igrexa con candeas benditas. Esta purificación virxinal e as candeas eran o antídoto cristián para a fertilidade romana e os fachos “lupercales”.
En Galicia non só era moi celebrada esta festa dentro do relixioso, senón que, no ámbito agrario, se celebraba o “casamento dos paxariños” . Di un refrán que “a partir da Candeloria, ningunha ave voa soa”.

Quen era Isaac Díaz Pardo?

2012-01-08T10:14:00.010+01:00

Coñezamos un pouco mellor a Isaac Díaz Pardo a través de dous documentais.
(A foto é propiedade de Aduaneiros sen fronteiras)

(Preme na imaxe)

Padriños e madriñas de lectura

2011-12-31T18:03:00.002+01:00

Por segundo ano consecutivo, o alumnado de 5º e 6º de primaria, a través do departamento de dinamización, fixemos o apadriñamento de lectura cos nenos e nenas de infantil.
Cada mércores no recreo, encárganse de ler un conto aos seus afillados e afilladas.
Deixamos unhas fotos do primeiro día deste curso.

Os cogomelos

2011-11-13T17:54:00.003+01:00

Estamos na estación dos cogomelos e aproveitamos para saber máis cousas sobre eles.

Deixamos un video que explica moi ben os cogomelos en Galicia...

Máis bruxas

2011-11-01T17:33:00.006+01:00

Aproveitando as datas e o Samaín, os alumnos de 4º, co profe Abraham, debuxaron estas bruxas

O manual das bruxas

2011-11-01T16:20:00.006+01:00

A cousa vai de meigas..

Este ano, grazas a un alumno, poidemos disfrutar de novo deste conto, indicado para infantil e primaria e editado no ano 1985 por edicións Xerais e que esperamos se revise e se volva a editar..
O indice xa nos orienta un pouco de que vai o conto e o talante:

- Como elixir casa e mobiliario
- A cociña da bruxa
- O xardín da bruxa
- Para decir a boa ventura e o zodiaco
- Como botar conxuros
- Contos de vellas
- Como conservarse fermosa
- Moda para bruxas elegantes
- Artes e enredos
- Sobre festas e festexos
- A bruxa moderna

O seu autor Malcolm Bird, ilustrador e escritor

É unha xoia!!!

Árbores e froitos de outono

2011-10-15T10:49:00.002+02:00

(As imaxes son do albúm de brichi e os textos traducidos ao galego)

A avoa grilo

2011-09-22T19:45:00.004+02:00

Xa estamos de novo aquí e comenzamos deixando un video que nos enviaron por correo...

Esculpindo Galiza

2011-05-08T09:34:00.009+02:00

A asociación cultural Andarela, convidounos a participar no concurso "Esculpindo Galiza".
E estos foron os traballos que fixeron algúns nenos e nenas en colaboración coas suas nais e pais.
Os premios serán entregados o domingo, día 15, as 18 h. na praza de Pascual Veiga en Sanxenxo aproveitando a celebración das Letras Galegas.

Para ir coñecendo a Lois Pereiro

2011-05-01T14:57:00.005+02:00

Na páxina de Galieconenos, atopei este lim con actividades sobre o homenaxeado deste ano no día das Letras Galegas, Lois Pereiro.
Máis ligazóns, fichas, información e lim en Seminario Galán

Día do libro

2011-04-23T11:28:00.002+02:00

Celebramos o día do libro e o equipo de dinamización do colexio deixou algunhas recomendacións...

Abraham Carreiro

2011-03-28T15:47:00.003+02:00

O pasado xoves pasou pola escola o ilustrador Abraham Carreiro para ensinarnos un pouco o mundo da ilustración e falarnos da súa colección Contos que len outros nenos do mundo

Aquelas mulleres

2011-03-08T08:59:00.006+01:00

Hai datas que non debemos esquecer nunca.
A de hoxe é unha delas.
Día Internacional da Muller Traballadora.
Hoxe, hai 103 anos que 129 mulleres morrían no incendio dunha fábrica textil de Nova York, encerradas para reclamar a igualdade de dereitos laborais cos homes.
Reclamar a igualdade hai que facelo todos os días do ano pero lembrar aquelas mulleres, si merecen un día de celebración no calendario.
Grazas!

Francisco Asorey

2011-03-04T10:48:00.006+01:00

E xa que estamos a lembrar aniversarios, non nos esquecemos do de Francisco Asorey, escultor galego, nado en Cambados o 4 de marzo do ano 1889.
Podemos gozar das súas obras ao longo de toda Galicia.

Vivaldi

2011-03-04T10:25:00.004+01:00

Tal día coma hoxe, 4 de marzo do ano 1678, nacía en Venecia un neno que máis tarde sería sacerdote e compositor.
Ese home era Antonio Vivaldi.
Deixóunos grandes obras musicais entre as que escollemos unha mostra "A primavera" que forma parte do concerto "Catro Estacións" aproveitando a época na que estamos.

Onde está Ravachol?

2011-03-01T10:52:00.009+01:00

Preme na imaxe para procurar o loro

Este ano o cartel do entroido de Pontevedra do debuxante Kiko da Silva é un auténtico homenaxe á historia da banda deseñada e un exemplo de interactividade e didáctica.
Emulando aos coñecidos contos "Donde está Wally" hai que atopar ao loro Ravachol que é o personaxe máis famoso do entroido da cidade e que ten a súa historia.
Se pasades por Pontevedra non esquezades de pedir un programa do entroido porque ademáis das actividades da festa, ten un feixe de xogos para os cativos e cativas.

As árbores

2011-02-20T20:26:00.006+01:00

Para saber un pouco máis sobre as árbores xa que estamos no Ano Internacional dos Bosques.
Preme en cada cartel e terás máis información, actividades, conto, documental e, ata escoitar os sons dos bosques se picas no reproductor. :))

Xornadas de xadrez

2011-02-10T19:40:00.005+01:00

Hoxe no centro estivemos a xogar ao xadrez.
O profe Hector de Escola de Xadrez Pontevedra estivo a explicarnos en que consiste o xadrez e a coñecer as normas básicas para poder xogar.
Esta xornada completarase, o próximo xoves, coa proxección da película En busca de Bobby Fisher e, ao seguinte, con outra xornada de práctica do xogo.
Nesta actividade está a intervir todo o alumnado do centro.

2011 Ano Internacional dos morcegos

2011-02-08T09:50:00.007+01:00

O ano 2011-2012 foi declarado Ano Internacional dos morcegos por as Nacións Unidas para o Medio Ambiente (UNEP).
O morcego é un mamífero que por tradición tivo moi mala prensa sen ter en conta a súa axuda para o mantemento dos ecosistemas do planeta.
Estes animais sempre estiveron moi presentes na cultura popular galega.
Para estar mais informados sobre os morcegos en Galicia, podemos ter axuda na web de DROSERA e a web de Morcegos de Galicia con bastantes recursos no apartado de documentación como as imaxes seguintes:

Día escolar da paz e non violencia

2011-02-01T16:19:00.007+01:00

O día 28 non poidemos facer a marcha pola paz por mor do mal tempo, así que onte fomos pola praia da Lanzada coas nosas pombas e pancartas reclamando menos violencia.
Fixemos coa area a palabra paz e alguns nenos e nenas leron en voz alta os nosos desexos.

30 de xaneiro

2011-01-26T02:08:00.003+01:00

Padriño de lectura

2011-01-25T19:47:00.004+01:00

O alumnado de 5º e 6º de primaria fixeron un apadriñamento de lectura.
Un día da semana, no recreo, contan ou len unha historia aos pequenos e pequenas de infantil para fomentar o gusto pola lectura e os libros.
É unha satisfacción ver o interese que poñen tanto os padriños coma os afillados. :))

A Paz

2011-01-20T19:59:00.006+01:00

O próximo xoves, 27 as catro da tarde, celebraremos no centro o Día da Paz.
Faremos unha marcha pola paz pola praia da Lanzada con mensaxes relativas ao día e remataremos deixando unha mensaxe feita con area.
Ademáis dos pais, familiares e amigos do alumnado, está invitado todo o mundo que queira asistir e acompañarnos.

Estrea

2011-01-12T16:06:00.005+01:00

O blog ten traxe de estrea!! Benvido o novo ano!!

ContoPlanet, o lugar onde os contos queren estar...
É unha aplicación de contos infantís para iPhone e iPad, que converte cada historia nunha experiencia emocional, intuitiva e amable.
Seleccionaron unha serie de contos pertecentes á colección Arbore, da Editorial Galaxia.

Todo un mundo de posibilidades tamén para mestres e mestras.. :))

Festival de Nadal 2010

2010-12-29T08:46:00.009+01:00

Xa rematou, xa non hai mais, gracias a vós por vir aquí...

Esta era unha das cancións (do grupo de teatro Caracol) que se cantou no festival de nadal e que aproveito tamén para rematar o ano do blog dando as grazas por petar na nosa porta e desexárvos un 2011 cheo de esperanzas, soños, optimismo, ledicia..

Aquí deixamos algunhas das fotos do festival :))

As tres raíñas magas

2010-12-18T11:50:00.007+01:00

O pasado xoves, o grupo de teatro "Mondo Lirondo" do que forma parte a nosa profe Ana Elisa, tiveron a amabilidade de facer a súa "estrea mundial" no noso colexio, da obra "AS TRES RAÍÑAS MAGAS" basada na poesía de Gloria Fuertes "El camello cojito".
No mes de abril do 2011, está previsto a estrea da película "Os contos de Gloria Fuertes" doblada a varios idiomas e entre eles, o galego.

Felicitamos dende aquí ao grupo polo seu rotundo éxito e dámoslles as grazas por facer que o pasaramos tan ben ainda que as condicións do escenario non foran as máis axeitadas. :)

O Colexio viste de nadal

2010-12-11T17:36:00.004+01:00

Coa inestimable colaboración dos pais e nais que nesta ponte pasada traballaron cos nenos e nenas na creatividade, poidemos comezar a vestir o noso bosque máxico de festa e o nadal asoma nas polas das nosas árbores..

Novembro

2010-11-20T16:51:00.004+01:00

"Polo S. Martiño deixa a auga e bebe o viño".
Lembramos algúns refráns do mes de novembro no que observamos que S. Martiño (en xeral todo o santoral) e o gran protagonista.

Aprendendo sobre o mar

2010-11-17T16:41:00.006+01:00

Hoxe tivemos no centro a visita do Dr. Octo e a Dra. Medusa realizando un obradoiro.
Os nenos e nenas de primaria tiveron a oportunidade de participar nalgún experimento relacionado coas ciencias do mar e déronnos información por se nos interesaba participar no concurso Galicia e as ciencias do mar 2010.

Enredando coas castañas

2010-11-08T18:41:00.014+01:00

A castaña é un alimento nutritivo de pequeno tamaño e similar á noz ou a un amorodo, pero cuberta por unha tona delgada e resistente de cor castaño. Esta cor varía en función da idade da castaña.
Ten tres envolturas distintas. A súa primeira envoltura é o ourizo, rodeado de espiñas e dentro do cal adoitan aparecer as castañas en grupos de tres.
Unha vez que o ourizo se abre, cae ao chan e retíranse do seu interior as castañas.
Pódense consumir crúas, frescas, ou ben cociñadas (asadas, guisadas ou cocidas) ou preparadas para a conservación. Tamén se pode moer para a obtención de fariña.

As súas flores utilizábanse antigamente para aromatizar o tabaco de pipa.
É rica en hidratos de carbono e contén pequenas cantidades de graxa e proteína, así como vitaminas A, B e C.
É un dos alimentos mais antigos da humanidade. Sábese que dende o Paleolítico, os froitos secos, e especialmente as castañas e landras, constituían unha parte importante na dieta do home.
En Europa temos constancia da existencia da castaña xá desde a época de Homero pero con mais presenza en tempos dos romanos.
Suponse que na relixión celta o castiñeiro era venerado pólos druidas, ao igual que o carballo, pois ambas árbores formaban o bosque prerromano.
O nome da castaña procede do grego kastana e do romano castanea.
Galícia xunto con Astúrias son as maiores produtoras de castaña da península.
Na cociña, o mais usual é pelalas e fervelas durante aproximadamente media hora para telas como preparado para outros pratos. Unha das formas mais comuns de consumir as castañas é asadas ao forno ao á brasa.

Dicionario dos tipos de castañas en función da súa forma, sabor ou calidade:

Bolerca: a que abortou no ourizo e non medrou. Son castañas non comestibles, pequenas e aplanadas só formadas por pel.
Barais: duras pero que adoitan ser moi saborosas.
Brava: a do castiñeiro bravo, sen enxertar.
Bullote: castaña asada no tixolo, unha tixola con buratos.
Burgazo: castaña fresca cocida que se toma con leite.
Crouco: castaña pequena.
Degraída: a castaña que cae madura do ourizo. Tamén se lles chaman degaros.
Enxeridas: formadas por varias pezas.
Maia: a castaña pilonga e seca.
Mamota: cocida coas dúas tonas. É a castaña mal asada que non pela ben.
Pilonga: castaña seca.
Rañudas: castañas alargadas e claras.
Temperás: as que nacen antes que as outras, as temperás. Son pequenas e redondas.
Zoncho: a castaña mamota.

Termos relacionados coas castañas:

Amoxegar: petiscar cos dentes ou marcar cun coitelo as castañas que van a ser asadas para que non estoupen.
Amoxetadura: a mordedela en concreto.
Barexar: roubar castañas aos veciños para facer o magosto.
Caldudas: potaxe de castañas secas cocidas.
Moreas: xeito de xuntar os ourizos para golpealos e sacarlle as castañas.
Petela: pinzas de madeira coas que se recollen as castañas do ourizo.
Picós: anacos de tona (xunto con algunha que outra castaña ou anacos delas) que se lles dá aos porcos na ceba.
Rangalleira: expresión que se utiliza para referirse á abundancia do viño durante o dia do magosto: “o viño corre á rangalleira”.
Suchar: chuchar unha castaña pilonga ata que se desfai e se consome.
Taloura o bareiro: vara longa coa que se zorregan as pólas do castiñeiro para que o ourizo solte a castaña.
Tixolo: tixola con buratos na que se asan as castañas.
Tonas: cascas das castañas.
Xemas: partes da castaña.

Adiviñas

Alto me vexo
No meu lugarexo
Por unha risada,
Perdín miña añada.

Altos padres
Capeludas madres
E os fillos inchafoles
Adiviña ti se podes.

Son verde e non son limón
Son carbón, son vermella e non son sangue,
Son branca e non son papel
Que cousa cousiña son?

Unha cousiña cousa,
Son moura e non
Criada no monte,
Enxoita na casa
E cómese sen tasa.

Alto foi meu nacemento de doncela recollida
Cando ia para me rir,
Tal foi a queda que dei
Que a casa non mais voltei.
Altetes, altetes con seus carrapetes;
Co riso que lle deu,
Todo se perdeu.

Trucos para a súa preparación:

- Para cocelas: despois de pelalas, cóbrense ben con auga ou leite e cócense entre 15 ou 20 minutos sen deixar que fervan. Caso de que as castañas sexan conxeladas é preferible desconxelalas antes. Debemos descartar aquelas que aboien xá que seguramente terán algún verme.

- Para asalas: é necesario facerlle unha regaña cun coitelo para que non estoupen. Despois, poñémolas no forno ou nunha tixola con buracos durante o tempo suficiente para que a tona superior quede asada.

- Para conxelalas: tras realizar o proceso de pelado, cocémolas durante 20 minutos engadíndolle unha presada de sal por litro de auga. Deixamos que arrefríen no propio líquido e gardámolas co xugo en tarros de vidro, procurando que non cheguen a estar cheos de todo para evitar que estoupen ao seren conxeladas.

RECEITA

Espaguetis con castañas

Ingredientes:

400 gr. de espaguetis, 450 gr. de castañas, aceite, sal, pementa, sementes de fiúncho.

Método:

Quítalle a tona ás castañas e déixaas en auga salgada xunto cunha cullerada de sementes de fiúncho. Cando as castañas estean cocidas bota os espaguetis. Escorre e condimenta con aceite cru e pementa moida.

Bó magosto. :))

A mentira

2010-11-05T19:13:00.004+01:00

É mentira é o tema do XII Salón do Libro Infantil e Xuvenil de Pontevedra que se celebrará no próximo mes de febreiro.
A mentira é un recurso moi utilizado na literatura, e máis ainda na infantil e xuvenil onde casi todos os contos clásicos e moitos actuais teñen un remate feliz grazas a superar as aventuras e desventuras orixinadas por os enganos que sofren os personaxes.

A responsabilidade

2010-11-05T16:43:00.006+01:00

A profe Ana Elisa de 4º de primaria está a traballar cos seus alumnos e alumnas a responsabilidade.
A responsabilidade sobre os demais polo que cada un levou ao colexio as súas mascotas, e sobre si mesmos empezando pola propia alimentación e coidado do corpo.
Así que hoxe para rematar o proxecto celebráronno cociñando e facendo pizzas.
De entrada poderíamos pensar que non é o máis saudable pero os alimentos son bos ou non, dependendo dos ingredientes, o xeito de mesturalos e cociñalos.
Por alí había aceite de oliva, fariña, lévedo, sal, pementos, tomate, queixos... Mesturaron, amasaron, cociñaron e... comeron.
E estas pizzas eran moi sans... e riquísimas :))

As buxainas, trompos, peóns, bailaretes...

2010-10-30T11:30:00.017+02:00

A buxaina é un dos xoguetes máis antigos da humanidade. Algúns dín que dende a prehistoria e que surxiu coma imitación do mecanismo para facer lume.
A buxaina máis antiga que consta é de 4000 anos a.c., seica é de arxila. Os grandes impulsores foron os chineses e xaponeses.
A partires de aí e ao longo da historia, van aparecendo diferentes modelos de buxainas, trompos, peóns, bailaretes..

O trompo consiste nun corpo de forma cónica, cun saínte na base chamado espiga e terminado no pico cunha peza metálica chamada púa, puga, puia, pico ou rexón, a cal se apoia no chan cando xira.
Enrólase unha pequena corda chamada piola arredor del e logo lánzase con forza ao chan onde xira ou baila certo tempo ata que cae.

Así podemos topar distintas formas do xoguete nas variadas áreas de cultura.
Por exemplo en literatura xa son nombradas por Virxilio, Marco Aurelio, Platón.. pasando por Cervantes, Quevedo, Alarcón, Flaubert, Tolstoi, Dostoievski, Cortázar, Lewis Carroll, Verne, Kafka.. e así indefinidamente.

Na pintura en cadros coma "Xogos de nenos" de Pieter Bruehel O vello, "Rapaces xogando á buxaina" de José del Castillo, "O neno do bailarete" de Jean-Baptiste Chardín, "Buxaina" de Isabel Somoza, "A muller buxaina" de Miró..

Na música temos cancións infantis coma
"O peón" do albúm de Monolo rico Unha pulga e un pulgón (1982)
"A buxaina brincadeira" do albúm Cantareliña de Saraibas (1983)
"O vals do trompo" do grupo Cri-Cri

No cine, o trompo, aparece en escenas de películas famosas coma "Titanic", "Xoana a tola", "Estación Central do Brasil" e a recente "Orixe" entre outras..

E en outras manifestacións culturais coma selos, zooloxía, publicidade e ata hai un museo en Burlington (EE.UU.)

Refráns..

Polo Pilar, buxainas a bailar.
Polo san Martiño, buxainas ao camiño.
Pola Santa Eulalia, peóns á borralla.
Polo San Amaro, buxainas no faiado.

Adiviñas..

Bailo sempre moi dereito
e cando empezo a cansar
tremo e quedo quieto no chan
ata que alguén me ven levantar.

Non teño pés nin mans
bailar é o meu destino
na palma son levado
e entreteño aos cativos.

Do ceo vino baixar
dando un brinco moi lixeiro
e sabe escribir e bailar.

Para bailar póñome a capa
para bailar vólvoa sacar
xa non podo bailar coa capa
e sen a capa non podo bailar.

Ligazóns

Amics de la baldufa
O Mundo das buxainas
Peonza

Samaín V

2010-10-26T15:15:00.013+02:00

Tempo de meigas

Samaín IV

2010-10-22T18:33:00.015+02:00

Morcegos

Diferentes modelos de morcegos. Premer nas imaxes para ampliar.

Samaín III

2010-10-20T15:43:00.008+02:00

As cabazas

Careta de cabaza con prato de cartón pintado de laranxa. A da dereita é coa técnica de origami.

As duas cabazas están feitas con tiras de cartolinas. Tamén sirven coma móbiles.

Á esquerda explícase como se recorta unha cabaza dunha forma moi sinxela e na dereita tres cabazas feitas con tea.

Dous manteis de mesa individuais como tema do samaín. O da dereita está feito con pegatinas do samaín e plastificadas.

Samaín II

2010-10-18T19:42:00.003+02:00

Hoxe tócalle aos pantasmas..

Pantasma feito con papel de periódico, escobillóns e forrado con unha venda.

Este está feito con un prato de cartón ou plástico e tiras de papel. Á dereita diferentes modelos de caras que se poden facer.

Os da esquerda son moldes de papel para facer manteigadas e os da dereita fanse con tubos de cartón forrados con papel de cociña. Faise unha boliña de papel con un pau para meter por dentro do tubo e despois forrase con un pano de papel.

O da esquerda é unha boliña de papel forrado con un pano de papel. Os pantasmas da dereita con bolas de papel ou globos con papel gasa por riba.

E por último, o da esquerda está feito con plastilina (tamén se poden facer de mazapán) e o da dereita con un guante de goma.

Samaín I

2010-10-16T09:43:00.013+02:00

Polo camiño vai chegando o samaín con tod@s os seus personaxes..
Nós recibirémolo pouco a poco e deixaremos por aquí algúns recursos sinxelos para facer cos nenos e nenas para decorar a aula e que fomos recopilando pola rede.

Hoxe tócalle ás arañas:

Araña feita con un pompón de tiras de papel pinocho

A da esquerda está feita con un globo pintado primeiro con cola blanca e despois con témpera negra. As patas son de cartolina.
A da dereita está feita con plastilina.

A araña da esquerda ten as patas de regaliz e o corpo é un lacasito.
A da dereita está feita con un retallo de pel con pelo e patas de escobillóns.

A da esquerda está feita de tea e a da dereita, o corpo é un pompón e as patas escobillóns.

As duas arañas están feitas con escobillóns e o corpo de lá.

Bolboretas voando dentro de min..

2010-10-09T10:06:00.013+02:00

"Milleiros de bolboretas voando dentro de min".. son as derradeiras palabras do conto "Bolboretas" de Xabier P. Docampo que non debería faltar en ningunha biblioteca.
O xogo é un dos principios pedagóxicos que engaiola ás rapazas e rapaces no mundo da aprendizaxe, e iso non debe servir só para os contidos curriculares.
A proba está neste libro onde a través do xogo entramos, de corazón, na aprendizaxe dos sentimentos.

E os sentimentos teñen moitas cores, e formas, e sons, e texturas, e sabores.. e senon podemos comprobalo nalgúns contos:

Outubro

2010-10-06T20:43:00.006+02:00

"En outubro non molesta o lume".
Eso dí un dos refráns que se pode ver na imaxe da esquerda.
No cole, en infantil, as mestras escollen cada mes un dito e fan un cartel que logo aprenden os nenos.
Aproveitamos, nós tamén, para lembralos e a pregunta que nos facemos é (ou son)..
En qué momento deixamos de valorar a sabiduría popular da nosa xente e, en todo caso, por qué e para qué?

Cancións de berce

2010-10-04T20:31:00.004+02:00

Unha forma diferente de traballar a interculturalidade
Cancións de berce é un proxecto que recolle vinte cancións de paises distintos.
Os debuxos foron feitos por xente diferente pero, sobretodo, por nenos e nenas.
Cada canción está interpretada na súa lingua orixinaria e o obxectivo é, que cando se escoiten as cancións, ter a sensación de ser arrolado por unha nai agarimosa.
A web está en tres idiomas: ruso (coido), francés e inglés.
Hai un canal en youtube que ten case tódolos videos (marabillosos salvo algunha desafortunada representación) do proxecto. Pódense atopar AQUÍ

Deixo coma mostra o video de Africa

Creatividade por riba de todo

2010-10-01T18:39:00.007+02:00

Hervé Tullet é un publicista francés que en 1.992 e, co gallo do nacemento do seu fillo, decidiu dedicarse a ilustración e en 1.994 publicou o seu primeiro libro infantil.
Na actualidade ten tres fillos que son a súa inspiración para seguir creando libros para nenos e nenas e onde o único que se necesita e dar liberdade á creatividade.

A súa páxina web é un fondo de recursos para xogar e aprender con pc ou pizarra dixital. Non puiden evitar enredar un pouco nunha das actividades e quedou como vedes aí, á dereita.

Unha de touros

2010-09-30T16:55:00.004+02:00

Estase a falar moito sobre o mundo do toreo no coto dos adult@s.
Pero que pensan os cativ@s? Un bó tema para tratar na aula.
Dous títulos que poderían axudar..

O traxe de luces de Faktoria K de Libros e Claudia e o touro de Kalandraka.

Setembro

2010-09-24T22:54:00.008+02:00

En setembro, estamos en plena vendima que, na nosa comarca, é falar de albariño.
Hai unha lenda que dí que o albariño foi traido polos monxes de Cluny que chegaron, ao mosteiro de Armenteira, no século XII pero o certo é que a cepa é autóctona de Galicia.
Deixamos dúas fotos.
Unha con refrans do mes de setembro e outra cos nomes en galego das partes da uva.

Para soñar...

2010-09-23T16:26:00.015+02:00

Outra adquisición da biblioteca do cole.. "Un gran soño" de Felipe Ugalde e editado por kalandraka e que gañou o II Premio Internacional Compostela de Album Ilustrado 2009.

As escavacións da Lanzada

2010-09-15T19:46:00.013+02:00

O equipo de normalización do centro organizou unha saída de primaria e parte de infantil ás escavacións que están a facerse a carón da ermita da Lanzada e moi preto do noso colexio.
Os nenos e nenas poideron observar in situ como traballan os arqueólogos, pezas atopadas e mesmo percurar eles mesmos algúns tesouros de milleiros de anos.

Qué fermoso é vivir

2010-09-10T01:21:00.008+02:00

Na nosa comunidade hoxe, un ano máis, están a encherse os colexios cos nenos e nenas. Todo un mundo por aprender, toda unha vida por disfrutar...
Comezamos!!!

E si se trata de comezar ben, que mellor que con esta canción da banda sonora da película "La vita è bella" cantada pola artista israelí Noa e subtitulada en galego.

Para ler xa...

2010-09-04T13:56:00.017+02:00

As tres últimas incorporacións á biblioteca do cole son tres contos en castelán do Fondo de Cultura Económica.
O primeiro titúlase "Belisario", moi axeitado para traballar a educación en valores

O título do segundo é "Secreto de Familia". Un libro que empeza así...
" Tengo un secreto: mi madre es un puercoespín, en realidad". Non pode deixar de lerse.

O terceiro, pode que máis enfocado para primaria (ou non), ten por título "La recta y el punto".
Un conto un pouco antigo de Norton Juster e que nos conta o romance entre a recta e o punto.
Deste último podemos ver o video tamén de fai xa un tempo. :)

A araña

2010-09-04T11:44:00.005+02:00

A araña é un novo xogo para pc ou pizarra dixital que consiste en mover o rato polo labirinto en forma de tea de araña ata conseguir que chegue a súa casa.

Ano Internacional dos Bosques

2010-07-22T15:45:00.011+02:00

O ano 2011 foi designado pola Asemblea Xeral das Nacións Unidas como "Ano Internacional dos Bosques".
Está ben telo en conta por se interesa para as programacións do próximo curso.
Para sabelo case todo sobre as árbores, podemos consultar e/ou descargar a guía didáctica "OS SEGREDOS DAS ÁRBORES"
E para informarse ben sobre como está a situación temos a proposta didáctica de greenpeace. "Un paseo didáctico polos bosques" que podemos descargar.

Tamén podemos recurrir as películas "O BOSQUE ANIMADO" e "O ESPÍRITO DO BOSQUE"

E se queredes (e podedes), a compañía de teatro de títeres Falcatrúa, ten en cartel unha obra tamén titulada "O ESPÍRITO DO BOSQUE"

E para rematar, un conto marabilloso da editorial OQO que ten por título "UN SEGREDO DO BOSQUE"

Lois Pereiro

2010-07-22T13:41:00.003+02:00

No próximo ano será homenaxeado no Día das Letras Galegas "Lois Pereiro".
No enlace anterior, podédes atopar moita información sobre él e sobre a revista Loia

A vaca que puxo un ovo

2010-07-22T12:21:00.004+02:00

E comezo por un conto que descubrín pouco antes de rematar o curso "A vaca que puxo un ovo" da editorial Patasdepeixe

O conto tamén ten video en castelán por si o queredes escoitar.. ainda que non hai maior pracer como contálo un mesmo ...

Reciclando

2010-07-22T11:16:00.002+02:00

Este blog queda convertido nun pequeno caixarolo de curiosidades que atope na miña labor diaria e que poidan servir para o exercicio da miña profesión.

O campo de fútbol de Noalla

2009-03-15T10:57:00.014+01:00

E pola tarde, aproveitando que podemos utilizar as "novísimas" instalacións do campo de fútbol de Noalla, organizamos un partidiño co alumnado de sexto curso, pares contra impares e, sorprendentemente, o partido rematou con un resultado de 4-4.

As formas na música

2009-03-15T10:27:00.013+01:00

O xoves pasado, pola mañá, asistimos en Pontevedra a representación músical "As formas na música" no audotorio de Caixanova.
Como chegamos cedo, fixemos un pouco de tempo e aproveitamos para merendar no parque para máis tarde asistir á obra.
Deixamos fotos como testimuña da saida.

Sanxenxo, raíces de mar

2009-03-15T10:09:00.007+01:00

O mércores pasaron polo centro os editores da guía didáctica "Sanxenxo, raíces de mar".
Mediante unha presentación explicaron aos nenos unha idea xeral do contido do libro.
A exposición foi moi interesante e algúns exemplares xa forman parte da nosa biblioteca.

Entroido

2009-03-03T22:44:00.010+01:00

O día 20 pola mañá celebramos no colexio a festa do entroido.
O tema deste ano era o universo e a nós tocounos de astronautas.
Despois de todo o traballo que nos deron os cascos para facelos, a cousa quedou así.
Semellaban astronautas de verdade!!
A festa que houbo despois do desfile rematou coa colaboración dos pais que aportaron todo tipo de repostería desta época do ano e bebidas.

Salón do libro de Pontevedra

2009-02-19T21:14:00.011+01:00

Hoxe estivemos no X Salón do Libro de Pontevedra.
O Salón que non nos deixou participar porque din que só o poden facer os colexios de Pontevedra cidade e comarca ou estar "directamente" invitado pola organización.
Botamos de menos a nosa aportación, as historias de amor que queríamos levar e contarlles aos demais.
Non poido ser.
Deixamos unhas fotos da visita.

Solidariedade

2009-02-14T15:37:00.014+01:00

Solidarizándonos, o xoves 12, lembramos o día Internacional dos Nenos Soldados.
O centro, tódolos los anos colabora coa O.N.G. "Save the Children" e pola tarde organizamos e participamos na carreira solidaria.
Consiste en levar á casa un carnet onde se anotan tódalas persoas que queren aportar e poñendo, voluntariamente, prezo a cada volta que dará o neno do colexio na carreira organizada.
Coa asistencia de pais e nais e un tempo que tamén quixo axudar cun ceo azul, azul, corremos todos/as dende infantil ata sexto de primaria.
Ao final pasaron todos/as pola mesa dos árbitros para anotar as suas voltas e levar o carnet a casa para que cada quen abone o importe que anotou.
Un xeito divertido e san de contribuir.

Mesturando

2009-02-09T18:33:00.019+01:00

O próximo día 20 pola mañá faremos no centro a festa do Entroido.
O entroido é unha celebración cunha grande tradición en Galiza que non só lembramos polos disfraces senon tamén pola gastronomía característica desta época ou pola música e que non ten nada que envexar ós de Venecia ou Brasil.
Como está a celebrarse o Ano Internacional da Astronomía, acordamos entre todos facer o noso particular universo.
Así, haberá estrelas, luas, planetas, cometas…

Ós de sexto tocóunos ir de astronautas.
Andamos metidos en faena facendo os cascos coa técnica de forrar globos grandes con periódicos e logo pintalos e facerlle un burato para poder ver e tamén buscando toda clase de tubos e complementos para que quede como é debido.

Non pensedes que é un traballo fácil porque no primeiro intento xa explotaron algúns globos e hai que comezar de novo.
Eso sí, seremos uns astronautas do máis enxebre. Do país.
Unha vez pasada a festa deixaremos fotos para que se poida ver o noso traballo.

Despois de consultar tódalas las ligazóns, lembramos:

De onde ven a palabra "entroido"?
Que é un peliqueiro?
Lembras a receita dalgunha comida típica do entroido?
Que quere decir "astronomía?
Por que o ano 2009 é declarado ano internacional da astronomía?
Que é un telescopio?

A biblioteca

2009-02-03T15:17:00.017+01:00

No pasado trimestre comezamos a montar unha pequena biblioteca na aula.
Destinamos un recuncho no que ademais dos libros que pedimos á biblioteca do colexio, xuntamos tamén algúns que mercamos.
Puxemos alguns xogos, unha mesa e duas cadeiras para poder ler e as alumnas e alumnos fixeron variados carteis para a animación á lectura.
Hoxe visitamos a biblioteca municipal de Portonovo.
Estaban a esperar por nós e pasamos un rato aprendendo como funciona, practicando na procura de libros e por último contaron un conto.
Unha mañá moi aproveitada.

A Paz

2009-01-30T21:54:00.009+01:00

O pasado venres celebramos o día da Paz con todo o colexio.
O alumnado de sexto curso fixo durante a semana, un mural na parede do corredor. Como coincidía unha porta no medio, decidimos deixala entraberta para que poida pasar a paz.
Xa o venres, participaron nas actividades programadas leendo frases de un video de persoas coñecidas, cantando cancions, facendo o símbolo da paz e soltando a pomba, como xa se contou no blog de infantil.
Deixamos fotos.

Negra Sombra

2009-01-19T23:33:00.014+01:00

Navegando pola rede, atopei este debuxo de Rosalía que me gustou xa que estou acostumada a vela en branco e negro (excepto na versión Andy Warhol das camisetas do rei zentolo).
A mín gústame unha Rosalía de cores porque coido que así sería no século XXI. E gústame Negra Sombra.
E cantada.
E por Luz Casal.
Pero encántame a versión do grupo A Caricia da Serpe coa voz de Lino Braxe.
Unha Negra Sombra tamén de cores a ritmo de reggae.
Deixo o video para que escoitedes a versión citada.

Despois de consultar tódalas ligazóns, lembramos:

1. Cal é o nome completo da escritora da letra?
2. Cando e onde naceu?
3. Como era o nome do compositor da música.
4. Cando e onde se estreou a peza?
5. Cando se celebra o "Día das Letras Galegas" e por qué?

O tren

2009-01-15T19:59:00.006+01:00

Adrián é un alumno ao que lle gusta cantar.
Ten o seu repertorio.
Os seus compañeiros o coñecen ben.
Pero a canción que mellor se lle da e a do "Tren" do mítico Andrés do Barro.
Un día que estabamos de festa na aula e tras petición dos compañeiros votouse a cantar con unha versión entrañable da citada canción. Prometinlle que o contaría no blog e hoxe é o día.
Deixo un video con outra versión da canción feita por "Elodio y los seres queridos"

Vacacións

2008-12-22T17:19:00.009+01:00

Esta árbore foi feita polos alumnos de 6º. En cada man escribiron unha palabra que coidaron importante pedir a quen corresponda.
E con todos eses desexos vos decimos: BO NADAL!

¿Quen é este persoeiro?

Quen vai ser... O Apalpador!!!

Fai anos. Moitos anos.
Moito antes que Santa Claus ou Papá Noel, en Galicia tiñamos e temos de novo, un pastor máxico, grandichón e bondadoso.
Leva pipa, un abrigo verde cheo de remendos, boina e zapatillas con calcetíns de diferente cor.
Vive na devesa das altas montañas do Courel e o Cebreiro. Ó longo do ano fabrica carbón, vive dos froitos silvestres e caza xabaríns.
Na noite de Nadal, baixaba ás aldeas, pobos e cidades para visitar, casa por casa, ós nenos e ás nenas que durmían.
Sen facer ruido apalpáballes as barrigas, sen facerlles cóxegas e despertalos, para saber se os raparigos e raparigas pasaban fame ou estaban ben alimentados.
Decíalles "Así, así esteas todo o ano" e marchaba deixándolles unha boa presada de castañas quentes.
As meniñas e meniños querían deitarse cedo e en tódalas casas de Galicia pola noitiña, escoitabase o run run:

Voume cedo a durmir,
marcho agora prá camiña
que vai vir o Apalpador
a palparme a barriguiña.

Según me contaron, de fontes fiables, agora o Apalpador ademáis de castañas tamén atende pedidos (xoguetes artesans, contos, obxectos de refugallo..) da crialla e seica con bastante dilixencia.
Así que este ano decidín que o 24 pola noitiña, voulle deixar ó Apalpador enriba da mesa, un bol de leite quentiña con mel e unhas rosquillas por si necesita coller forzas para repartir tódolos encargos ó longo da noite.
Boh! Está ben!
Tamén lle deixo unha notiña pedíndolle por favor (eso sí) unha axenda para o novo ano e anotar tódolos traballos que imos facer o alumnado de 6º e máis eu. ;)

Engadido...

Nas Terras de Trives o Apalpador chamábase o Pandigueiro.

Os nenos tiñan que durmir pedíndolle cun retrouxiño, que lles trouxera "leitiña con purgazos", esto é leite con castañas secas cocidas.
Ademais esperábase do Pandigueiro que deixara tamén figuriñas, xoguetiños, talladas na madeira cocida do amieiro.
Consérvase a tradición de dicirlle os nenos "vou cheirarche a barriga,
pándega ou o bandullo e vou saber o que comiches"

CARTA Ó PANDIGUEIRO

Pandigueiro na noitiña
pandigueiro venme axiña
que compre ben quentiña
uns purgazos na leitiña

Da cabeza grande baixa pandigueiro
ven cás lambetadas para os mais pequenos

Cá coroza ó lombo e as chancas nos pés
corre pandigueiro trainos de comer

Sae da túa cova, achégate a min
e cunha manciña tocarasme ti.

Unha apalpadiña cando esté a durmir
e o meu bandulliño comeza a sorrir

Pasarei a noite soñando contigo
pola mañanciña busco o regaliño

Enriba da mesa ben colocadiño
castañas cocidas en leite fervido

Pandigueiro na noitiña
Pandigueiro venme axiña
Que compre ben quentiña
Uns purgazos na leitiña

1º Premio

2008-12-22T16:22:00.019+01:00

Esperando as vacacións e ao longo da semana pasada tivemos visitas dabondo no colexio.
O mércores pasou por alí a xente do Parque Nacional das Illas Atlanticas para entregar os rapaces de 6º, diferente material así como camisetas, mochilas, chuvasqueiros, posters, etc. por ganar o primeiro premio, a nivel de comunidade autónoma, do concurso convocado este ano na modalidade de contos.

O mellor

2008-12-01T00:11:00.004+01:00

Este video xa foi visto cerca de corenta millons de veces. Seica é o mellor documental, non profesional, de vida salvaxe. É unha secuencia espectacular con escenario, guión e os mellores protagonistas.
Grazas a un grupo de turistas podemos disfrutalo.
Pincha e verás :)

Arco da vella

2008-11-30T18:38:00.005+01:00

Desde a ventá da aula poidemos facer esta foto que, aínda que non se ve moi ben, deunos para falar un rato sobre o fenómeno metereolóxico, o arco da vella.

Topei este refrán: "O arco da vella á travesía, tres semanas de invernía" pero sabemos que hai moitos mais.
Temos toda a semana para recoller diferentes refrans sobre o arco da vella ;)

Las raíces del mar

2008-11-24T12:48:00.007+01:00

Ya hemos leido la mitad del libro así que toca empezar a comentar.
Os dejo una imagen sobre el libro para que reflexioneis y comentemos después en el aula.
Tenemos que hacer el dibujo que indica en la hoja. Se agradece creatividad. Lo comentaremos el lunes próximo, día 1.

(Pinchad en la foto para hacerla más grande e imprimirla).

As fotos do Samaín

2008-11-23T16:10:00.007+01:00

Se pinchades na imaxe poderedes ver as fotos do Samaín e os xogos que fixemos despois para celebralo.
(Pode tardar un pouquiño en cargar todas as fotos.)

Son eles!!

2008-11-15T17:54:00.003+01:00

Sí, son eles! Os alumnos de 6º do ceip Noalla-Telleiro.
Aí están o día da festa do Samaín cunha pose "moi natural" :)

Celebrando o outono

2008-11-02T21:05:00.008+01:00

O venres pasado celebramos no centro o Samaín.
Unha das festas do outono e á que lle seguirá o xoves que ven a do Magosto.
Ós de terceiro ciclo tocóunos facer o mural da matanza e intentamos reflexar un pouco o que era esta tradición antes e o papel estelar de agora do porco nos contos, no cinema ademáis do que sabemos polo coñecemento do medio.
Para que a cousa fose unha chisca interactiva, puxemos uns porquiños en cartolina para que tódolos rapaces do colexio os poidesen recortar.

Un xoguete, unha ilusión

2008-10-24T15:36:00.007+02:00

Como decidimos participar no "V Concurso de Contos Solidarios", creando un conto entre todos, andamos a romper os miolos para facer algo axeitado co tema.
Xa fixemos unha posta en común así coas primeiras ideas de cada un. A semana que ven comezaremos a encaixar as pezas. Por ganas e vontade que non sexa porque ese é o noso modo de colaborar coa campaña "Un xoguete, unha ilusión".

Visita

2008-10-23T21:29:00.004+02:00

Hoxe tivemos a visita no colexio da escritora Alba Nélida Paz Framil.
Alba enterouse de que escolléramos o seu libro "Contos e lendas da Lanzada" para traballar neste trimestre e quixo regalarnos algúns exemplares para a biblioteca, tanto en castelán como en galego e firmados por ela.

Salón do libro

2008-10-22T21:57:00.005+02:00

O X Salón do libro infantil e xuvenil de Pontevedra acaba de colgar na súa web unha relación da bibliografía referente as historias de amor e que será ó tema do ano 2009 no mes de febreiro.

Benvida

2008-10-12T21:41:00.003+02:00

Benvidos ó blog que neste curso terá como protagonistas ós alumnos dunha aula de sexto curso do ceip Noalla-Telleiro na praia da Lanzada en Sanxenxo.